शिवसृष्टी प्रकल्पाची कामे गतीने पूर्ण करावीत*       *: मंत्री छगन भुजबळ*

*शिवसृष्टी प्रकल्पाची कामे गतीने पूर्ण करावीत*

*: मंत्री छगन भुजबळ*

*शिवसृष्टी प्रकल्पाची मंत्री भुजबळांनी केली पाहणी*

*नाशिक, दिनांक: 17 फेब्रुवारी, 2024 वृत्तसेवा):*

छत्रपती शिवाजी महाराज व त्यांच्या सहकाऱ्यांचा इतिहास सर्वसामान्यांपर्यंत पोहचवणारा शिवसृष्टी प्रकल्प अतिशय महत्त्वाचा आहे. हा प्रकल्प वेळेत साकारण्यासाठी त्याच्या कामांना प्राधान्य देवून गतीने कामे पूर्ण करावीत, अशा सूचना अन्न, नागरी पुरवठा व ग्राहक संरक्षण मंत्री छगन भुजबळ यांनी दिल्या.

येवला येथे पर्यटन व सांस्कृतिक विभागाच्या माध्यमातून उभारण्यात येणाऱ्या शिवसृष्टी प्रकल्पाची पाहणी मंत्री श्री भुजबळ यांनी केली त्यावेळी संबंधित अधिकारी व कंत्राटदार यांना सूचना दिल्या. यावेळी सार्वजनिक बांधकाम विभागाचे उपकार्यकारी अभियंता सागर चौधरी, आर्किटेक्चर सारंग पाटील यांच्यासह कंत्राटदार उपस्थित होते.

मंत्री छगन भुजबळ म्हणाले, शिवसृष्टी प्रकल्प बांधकाम करतांना व प्रकल्प पूर्ण झाल्यानंतर देखील याठिकाणी पाण्याची कमतरता भासणार नाही, याकरिता योग्य नियोजन करण्यात यावे. प्रकल्पाची कामे वेळेत करण्यासाठी आवश्यक निधीची मागणी करून कामांना वेग देण्याचे निर्देश ही यावेळी मंत्री छगन भुजबळ यांनी संबंधिताना दिले.

तत्पूर्वी, मंत्री छगन भुजबळ यांच्या हस्ते जिल्हा क्रीडा निधीतून स्वामी मुक्तानंद शाळेच्या आवारात बांधण्यात आलेल्या ग्रीन जिमचेही उद्घाटन करण्यात आले.

*अशी आहेत शिवसृष्टी प्रकल्पातील प्रस्तावित कामे….*

शिवसृष्टी प्रकल्पासाठी साधारण अकरा कोटी रुपयांचा निधी प्राप्त झाला आहे.

➡️ श्री छत्रपती शिवाजी महाराजांचा 10 फूट उंचीचा सिंहासनाधिष्टित मेघडंबरीसह पुतळा

➡️ महाराजांच्या जीवनातील महत्वाच्या घटना व महाराजांचे सेनापती यांचे भित्तीचित्रांच्या माध्यमातून प्रदर्शन

➡️ माहिती केंद्र व कार्यालय

➡️ शिवकालीन शस्त्रास्त्रांचे प्रदर्शन

➡️ ऑडिओ व्हिज्युअल हॉल

➡️ पुस्तक व साहित्य विक्री केंद्र

➡️ स्वच्छतागृह, उपहार गृह, गार्डन व वाहनतळ