31 मार्च होणार गोळीबाराची प्रात्यक्षिके प्रतिबंधित क्षेत्रात नागरिकांना जाण्यास सक्त मनाई. भागवत डोईफोडे.

*31 मार्चला होणार गोळीबाराची प्रात्यक्षिके;*

*प्रतिबंधित क्षेत्रात नागरीकांना जाण्यास सक्त मनाई*

*:भागवत डोईफोडे*

*नाशिक नाशिक जनमत : जनरल स्टाफ ऑफीसर ट्रेनिंग मुख्यालय तोफखाना व देवळाली कॅम्प आर्टिलरी स्कूल तर्फे इगतपुरी व नाशिक तालुक्यातील ‘एक्स सेक्टर’ या ठिकाणी 31 मार्च 2022 रोजी सकाळी 06.00 ते दुपारी 04.00 या वेळेत गोळीबाराची प्रात्यक्षिके केली जाणार आहे. त्या अनुषंगाने प्रतिबंधित केलेल्या क्षेत्रात नागरीकांनी प्रवेश करू नये, असे आवाहन अपर जिल्हादंडाधिकारी भागवत डोईफोडे यांनी शासकीय प्रसिद्धी पत्रकान्वये केले आहे.

प्रसिद्धी पत्रकात नमुद केल्यानुसार, इगतपुरी तालुक्यातील टाकेद खुर्द, अधरवड, बेळगाव तऱ्हाळे, सोनांशी, आडसर खुर्द, वारशिंगवणे, तळवाडी, कावाडदरा, सामनेरे, घोटी खुर्द, लहान घोटीची वाडी, नांदुरवैद्य, टाकेद बुद्रुक, धामणगाव, नांदगाव बुद्रुक, साकुर दुमाला, बेळगांव कुऱ्हे, मालुंजे, गंभीरवाडी, भरविर खुर्द, लहवित, अस्वली व नाशिक तालुक्यातील वंजारवाडी या गावाचे मुलकी हद्दीतील काही भाग तोफांच्या माऱ्याच्या रेषेत येतात. संबंधित ‘एक्स सेक्टर’ या क्षेत्रात गावातील नागरिकांना जाण्यास प्रतिबंध करण्यात आला असून, या क्षेत्रात जनावरांना जाऊ देवू नये. याबाबत संबंधित गावांमध्ये जाहिर दवंडीही देण्यात आली आहे.

प्रतिबंधित करण्यात आलेल्या क्षेत्रात प्रवेश केल्यास प्राण धोक्यात येऊन हानी झाल्यास त्याची जबाबदारी शासनाची राहणार नाही. या सूचनेचा भंग केल्यास त्या व्यक्तिविरुद्ध कायदेशीर कारवाई करण्यात येईल, असेही अपर जिल्हादंडाधिकारी भागवत डोईफोडे यांनी शासकीय प्रसिद्धी पत्रकान्वये कळविले आहे