अंध मतदारांकरीता मतदान प्रक्रिया होणार सुलभ*

*अंध मतदारांकरीता मतदान प्रक्रिया होणार सुलभ*

*नाशिक, दिनांक 23 एप्रिल, 2024 (जि. मा. का. वृत्तसेवा) :* लोकसभा सार्वत्रिक निवडणूक 2024 च्या अनुषंगाने भारत निवडणूक आयोगामार्फत अंध मतदारांसाठी मतदान प्रक्रिया सुलभ होण्यासाठी विविध सुविधा उपलब्ध केल्या असल्याची माहिती जिल्हाधिकारी तथा जिल्हा निवडणूक अधिकारी जलज शर्मा यांनी दिली आहे.

जिल्ह्यात 20 दिंडोरी आणि 21 नाशिक लोकसभा मतदार संघासाठी 20 मे 2024 रोजी मतदान होणार आहे. जिल्ह्यातील एकूण 15 विधानसभा मतदार संघात 3048 इतके अंध मतदार चिन्हांकित केलेले असुन त्यांचेकरिता विविध सुविधा मतदान प्रक्रिया सुलभ होणेकामी भारत निवडणूक आयोगाने उपलब्ध केलेल्या सुविधांतर्गत 40 टक्क्यांपेक्षा अधिक अंधत्व असलेले मतदार घरूनच टपाली मतपत्रिकेद्वारे आपला मतदानाचा अधिकार बजावू शकणार आहेत. तसेच 40 टक्क्यांपेक्षा कमी अंधत्व असलेले किंवा मतदान केंद्रावर येऊन मतदान नोंदविण्याची इच्छा असलेले अंध मतदार प्रत्यक्ष मतदान केंद्रावर येऊन मतदान करु शकतील. त्यासाठी त्यांचे घरापासून मतदान केंद्रापर्यंत वाहतूक व्यवस्था प्रशासनाकडून केली जाणार आहे. मतदान केंद्रावर पोहोचल्यावर प्रत्यक्ष मतदान खोलीपर्यंत पोहोचणेकामी स्वयंसेवकाची नेमणूक मतदान केंद्रावर केली जाणार आहे. प्रत्यक्ष ईव्हीएम मशिनवर मतदान प्रक्रिया पूर्ण करणेकामी ब्रेल लिपीतील मतपत्रिका नॅशनल असोसिएशन फॉर द ब्लाइंड, इंडिया (NAB) या संस्थेकडून मतदान केंद्रावर पुरविली जाणार असून ईव्हीएम मशिनवर ब्रेल लिपीमधील अंक उपलब्ध असणार आहेत.

अंध मतदारांना त्यांच्या मतदान केंद्राची माहिती मिळावी याकरिता घरबसल्या ब्रेल लिपीतील मतदार चिठ्ठी मतदान केंद्रस्तरीय अधिकारी यांचेमार्फत बजावली जाणार आहे. सक्षम ॲप मार्फत अंध मतदार यांना आवश्यक सुविधाची मागणी ऑनलाईन नोंदवू शकणार आहेत. जिल्ह्यातील सर्वच दिव्यांग बांधवांनी व विशेषत: अंध मतदार बांधवांनी भारत निवडणूक आयोगाने केलेल्या सुविधांचा लाभ घेऊन मतदानाचा अधिकार बजावावा, असे आवाहन जिल्हाधिकारी तथा जिल्हा निवडणूक अधिकारी जलज शर्मा यांनी केले आहे