कृषी तंत्रज्ञान व्यवस्थापन यंत्रणेच्या* *विविध पुरस्कारांसाठी अर्ज करण्याचे आवाहन* *: प्रकल्प संचालक राजेंद्र निकम*

*कृषी तंत्रज्ञान व्यवस्थापन यंत्रणेच्या*
*विविध पुरस्कारांसाठी अर्ज करण्याचे आवाहन*
*: प्रकल्प संचालक राजेंद्र निकम*

*नाशिक, दिनांक: 7 जुलै, 2023 नाशिक जनमत  वृत्तसेवा):*
कृषी तंत्रज्ञान व्यवस्थापन यंत्रणा (आत्मा), नाशिक यांच्या मार्फत दरवर्षी कृषी क्षेत्रात नाविन्यपूर्ण व प्रयोगशील काम करणाऱ्या शेतकऱ्यांना व शेतकरी गटांना प्रोत्साहन देण्यासाठी उत्कृष्ट शेतकरी , शेतकरी गट पुरस्कार देण्यात येतात. 2023-24 यावर्षात या पुरस्कारांच्‍या वर्गवारीत वाढ करण्यात आली असून या विविध पुरस्कारांसाठी शेतकरी, शेतकरी गट, शेतकरी उत्पादक कंपनी, कृषी विस्तारक व कृषी उद्योजक यांना अर्ज करण्याचे आवाहन कृषी तंत्रज्ञान व्यवस्थापन यंत्रणेचे प्रकल्प संचालक राजेंद्र निकम यांनी केले आहे.

विविध पुरस्कारांच्या अर्जांच्या अधिक माहितीसाठी इच्छुकांनी तालुका कृषी अधिकारी, तालुका तंत्रज्ञान व्यवस्थापक/सहाय्यक तंत्रज्ञान व्यवस्थापक यांच्याशी संपर्क करावा, असेही प्रकल्प संचालक श्री. निकम यांनी कळविले आहे.

*असे आहेत पुरस्कार व त्यांच्या अटी शर्ती…*
*1. उत्कृष्ट वैयक्तिक शेतकरी :* जे शेतकरी आपल्या शेतात आधुनिक/ सुधारीत तंत्रज्ञानाचा वापर करून शेतीमध्ये नाविन्यपूर्ण प्रयोग करतात व परीसरातील शेतकऱ्यांना देखील असे करण्यास प्रवृत्त करतात. परीसरातील प्रगतशिल शेतकरी आहेत, असे सर्व शेतकरी या वर्गवारीत अर्ज करु शकतात.
*2. उत्कृष्ट शेतकरी गट :* यामध्ये आत्मा संस्थेअंतर्गत नोंदणीकृत असलेला शेतकरी गट शेती व शेतीसलंग्न कामकाज करणारा असावा. गट आत्मा संस्थेकडे नोंदणीकृत असावा. तसेच गटामध्ये समन्वय, ऐक्य, नियमीत सभा, शेती आधारीत प्रक्रिया उद्योग करणारा असून स्वावलंबी असावा.
*3. उत्कृष्ट शेतकरी उत्पादक :* कृषी व कृषी सलंग्न क्षेत्रात काम करणारी कंपनी असावी. कंपनीचे सभासद संख्या कंपनीला होणारा नफा, गुणवत्तापूर्ण उत्पादने, तसेच कंपनीचे सामाजिक क्षेत्रात असलेले काम, नियमीत सभा, वार्षिक उलाढाल इ. बाबीमध्ये नेत्रदिपक कामगिरी आवश्यक आहे. तसेच कंपनी शेतकऱ्यांसाठी राबवित असलेले उपक्रम यानुसार परिपूर्ण असलेली शेतकरी उत्पादक कंपनी पुरस्कारासाठी अर्ज करु शकते.
*4. उत्कृष्ट कृषी विस्तारक :* कृषी विस्तार क्षेत्रात कार्यरत असलेले शासकीय अधिकारी/कर्मचारी, कृषि विद्यापीठ, कृषि विज्ञान केंद्रांमधील कृषी विस्तारक, कृषी विस्तार कार्यात कार्यरत पत्रकार ज्यांनी विस्तार कार्यात सलग तीन वर्ष काम केले आहे. ते या पुरस्कारासाठी प्रस्ताव पाठवु शकतात.
*5. उत्कृष्ट कृषी उद्योजक :* यामध्ये कृषी व कृषी सलंग्न क्षेत्रात व्यवसाय उद्योग उभारुन शेतकऱ्यांना त्याचा लाभ करुन देणारे उद्योजक यासाठी अर्ज करु शकतात. त्यांनी उभारलेल्या उद्योग व्यवसायातुन कृषि क्षेत्रात तसेच सामाजिक क्षेत्रात चांगले काम केले आहे तसेच नवीन कृषी उद्योजक यांना प्रोत्साहन देणारे उद्योजकांना देखील या वर्गवारीत अर्ज करता येईल, असेही प्रकल्प संचालक श्री. निकम यांनी कळविले आहे.