*’नाशिक मविप्र मॅरेथॉन-२०२५’चा विजेता ठरला मुंबईचा डॉ. कार्तिक करकेरा*

*आजवरच्या स्पर्धेतील विक्रम मोडीत, फूल मॅरेथॉनचे तिन्ही स्पर्धक महाराष्ट्राचे*

*नाशिक  जन्मत :*   येथील मराठा विद्या प्रसारक समाज संस्थेतर्फे रविवार दि.१२ जानेवारी रोजी पार पडलेल्या ९ व्या राष्ट्रीय व १४ व्या राज्यस्तरीय ‘नाशिक मविप्र मॅरेथॉन २०२५’ स्पर्धेतील फूल मॅरेथॉनचे (४२.१९५ किमी) विजेतेपद मुंबईच्या डॉ. कार्तिक जयराज करकेरा याने पटकावले. विशेष म्हणजे कार्तिकने २ तास २० मिनिटे या विक्रमी वेळेत स्पर्धा पूर्ण करून नवा विक्रम आपल्या नावावर केला आहे. सन २०१८ मध्ये झालेल्या नाशिक मविप्र मॅरेथॉनमध्ये करणसिंग (हरियाणा) याने २ तास २२ मिनिटे ३३ सेकंदात फूल मॅरेथॉन पूर्ण केली होती. हा विक्रमही यंदाच्या स्पर्धेत मोडीत निघाला.

कडाक्‍याच्या थंडीत रविवारी (दि.१२) पहाटे ५ वाजून ४५ मिनिटांनी स्पर्धेला सुरवात झाली. कडाक्‍याच्या थंडीतही धावपटूंचा उत्साह ओसंडून वाहत होता. वेगवेगळ्या १४ गटांमध्ये झालेल्या या स्पर्धेत चिमुकल्यांपासून ते वयोवृद्धांपर्यंत तब्बल चार हजारांहून अधिक धावपटूंनी सहभाग नोंदविला. ४२.१९५ किलोमीटर फूल मॅरेथॉनने स्पर्धेला सुरवात झाली. भारतीय हॉकी संघातील खेळाडू तथा रियो ऑलिम्पिकपटू रेणुका यादव, आयोजन समितीचे अध्यक्ष व मविप्रचे सरचिटणीस ॲड. नितीन ठाकरे, सभापती बाळासाहेब क्षीरसागर, उपाध्यक्ष विश्वास मोरे, चिटणीस दिलीप दळवी, उपसभापती देवराम मोगल, संचालक डॉ. सयाजीराव गायकवाड, ॲड. लक्ष्मण लांडगे, रमेश पिंगळे, ॲड. आर. के. बच्छाव, ॲड. संदीप गुळवे, शिवाजी गडाख, प्रवीण जाधव, विजय पगार, शालनताई सोनवणे, शोभाताई बोरस्ते, सेवक संचालक डॉ. एस. के. शिंदे, प्रा. सी. डी. शिंदे, जगन्नाथ निंबाळकर आदी मान्यवरांच्या प्रमुख उपस्थितीत हिरवा झेंडा दाखवत स्पर्धेला सुरवात करण्यात आली.

फूल मॅरेथॉनमध्ये धावताना डॉ. कार्तिकने २ तास २० मिनिटे अशी वेळ नोंदवत अव्वल क्रमांकासह मॅरेथॉनचे एक लाख ५१ हजार रूपयांचे पारितोषिक पटकावले. महाराष्ट्रातील नाशिक जिल्ह्यातील दिंडोरी तालुक्यातील सिकंदर चिंधू तडाखे या धावपटूने २ तास २० मिनिटे २ सेकंद अशी वेळ नोंदवत दुसऱ्या क्रमांकाचे एक लाखाचे तर महाराष्ट्रातील वर्धा जिल्ह्यातील विक्रम भरतसिंह बंगरिया या धावपटूने २ तास २० मिनिटे १२ सेकंद अशी वेळ नोंदवत तृतीय क्रमांकाचे ७५ हजारांचे पारितोषिक पटकावले.

स्पर्धेसाठी देशभरातून उत्तर प्रदेश, पंजाब, हरियाणा, मेघालय तसेच महाराष्ट्रातील विविध जिल्ह्यातील धावपटू असे एकूण साडेतीन हजारांपेक्षाही जास्त स्पर्धक सहभागी झाले होते. विशेष म्हणजे फूल मॅरेथॉनमधील पहिले तिन्ही धावपटू हे महाराष्ट्रातील आहेत. तसेच, नाशिकच्या सिकंदर तडाखे याने गेल्या वर्षीप्रमाणे यंदाही दुसरा क्रमांक कायम ठेवत मागील वर्षीपेक्षा यंदा सहा मिनिटे २१ सेकंद आधी स्पर्धा पूर्ण करून स्वतःचाच विक्रम मोडला आहे. खेळाडूंना प्रोत्साहन देण्यासाठी संस्थेच्या विविध शाळांतील विद्यार्थ्यांनी विविध वेशभूषा करून त्यांचा उत्साह वाढविला. तर रावसाहेब थोरात सभागृह परिसरात सांस्कृतिक कार्यक्रमांच्या आयोजनाने रंगत वाढवली होती.

बक्षीस वितरण समारंभ कर्मवीर रावसाहेब थोरात सभागृहात पार पडला. यावेळी विविध १४ गटांतील विजेत्यांसह सहभागी धावपटूंना मान्यवरांच्या हस्ते पदक देऊन सन्मानित करण्यात आले. यावेळी एकूण ८ लाख ५८ हजार रुपये रकमेच्या बक्षिसांचे वितरण करण्यात आले.

यावेळी आयोजन समितीचे अध्यक्ष व मविप्र सरचिटणीस ॲड. नितीन ठाकरे यांनी सांगितले कि, मविप्र मॅरेथॉन स्पर्धेच्या यशस्वीतेसाठी अत्यंत सूक्ष्म व काटेकोर नियोजन केलेले होते. धावणमार्ग मापनापासून ते स्पर्धा पूर्ण होईपर्यंत प्रत्येकाने आपापली जबाबदारी सक्षमपणे पार पाडल्याचे त्यांनी सांगितले. या स्पर्धेसाठी विदेशातील धावपटूंनीही नोंदणीसाठी संपर्क साधला होता. मात्र कायदेशीर कारणांमुळे त्यांना सहभाग घेता आला नाही. त्यामुळे येणाऱ्या काळात ही स्पर्धा आंतरराष्ट्रीय स्तरावर नेण्याकरिता सर्व कायदेशीर प्रक्रिया पूर्ण करण्यासाठी प्रयत्न केले जाणार आहेत.

भारतीय हॉकी खेळाडू रेणुका यादव म्हणाली, मविप्र ही महाराष्ट्रातील आघाडीची शिक्षणसंस्था असून, संस्थेने ‘मविप्र मॅरेथॉन’चे यशस्वी आयोजन केले. अनेक वर्षांपासून आयोजित केल्या जाणाऱ्या या स्पर्धेत आजवर अनेक राष्ट्रीय पातळीवरील दिग्गज खेळाडू व प्रशिक्षकांनी हजेरी लावली आहे. अशा नामवंत खेळाडूंची उपस्थिती आणि त्यांच्या मार्गदर्शनामुळे विविध स्पर्धेसाठी विद्यार्थी व खेळाडू यांना प्रेरणा मिळते, असे मत तिने व्यक्त केले. मला मविप्र संस्थेकरिता काही करण्याची संधी मिळाली तर मी स्वतःला भाग्यवान समजेल, असेही रेणुका यादव हिने यावेळी नमूद केले.

भारतीय ॲथलेटिक्स संघटनेद्वारे नियुक्त करण्यात आलेले स्पर्धा निरीक्षक राजा वेणू म्हणाले कि, मविप्रने स्पर्धेचे नियोजन अत्यंत चोख आणि उत्कृष्ट केले. मविप्रने संस्थेसाठी ॲथलेटिक्स फेडरेशन ऑफ इंडियाचे मानांकन घ्यावे, असे सांगून रुग्णवाहिका व वैद्यकीय पथकाचे विशेष अभिनंदन केले.

मविप्रचे सभापती बाळासाहेब क्षीरसागर यांनी प्रास्ताविक केले. डॉ. एस. एस. काळे यांनी प्रमुख पाहुण्यांचा, तर सौरभ टोचे यांनी स्पर्धा निरीक्षकांचा परिचय करून दिला. डॉ. तुषार पाटील यांनी सूत्रसंचलन केले. संस्थेचे उपाध्यक्ष विश्वासराव मोरे यांनी आभार मानले.

स्पर्धा यशस्वीतेसाठी शिक्षणाधिकारी डॉ. भास्कर ढोके, डॉ. नितीन जाधव, डॉ. डी. डी. लोखंडे, डॉ. विलास देशमुख, डॉ. अजित मोरे, प्रा. दौलत जाधव, डॉ. के. एस. शिंदे, प्राचार्य डॉ. एस. एस. काळे यांच्यासह आयोजन समितीच्या डॉ. मीनाक्षी गवळी, प्रा. हेमंत पाटील, प्रा. डॉ. सुनील धोंडगे, प्रा. अशोक काळे, डॉ. ज्ञानेश्वर गडाख, विजय शिंदे, एस. एम. यावलकर, प्रा. बाळासाहेब रायते, प्रा. अनिल उगले, प्रा. हेमंत काळे, प्रा. नामदेव काकड, प्रा. कल्पना कानवडे, प्रा. विजय ढिकले, प्रा. मुकुल भोसले, प्रा. राजेंद्र पोटे, डॉ. दिलीप गायकवाड, प्रा. उद्धव डेर्ले, प्रा. डॉ. राजाराम कारे आदी क्रीडाशिक्षकांसह शाखाप्रमुख, सेवक यांनी मॅरेथॉन स्पर्धेसाठी परिश्रम घेतले.

*‘फन रन’ने वेधले लक्ष*

यंदाच्या स्पर्धेत वेगवेगळ्या थिमवर आधारित ‘फन रन’ने सर्वांचेच लक्ष वेधून घेतले. यामध्ये पर्यावरण रक्षण, बेटी बचाव-बेटी पढाव, स्वच्छ भारत अभियान, पाणी वाचवा, झाडे लावा-झाडे जगवा, महिला सक्षमीकरण, निरोगी आरोग्य, योग, जागर शिक्षणाचा या सामाजिक विषयांवर जनजागृतीपर फलक हाती घेऊन स्पर्धक सहभागी झाल्याचे पाहायला मिळाले.

*अरुण मलानी यांना पत्रकार पुरस्कार प्रदान*

संस्थेच्या वतीने मविप्र मॅरेथॉननिमित्त गेल्या सहा वर्षांपासून आदर्श क्रीडा पत्रकार पुरस्कार प्रदान केला जातो. नाशिक जिल्ह्यातील ‘दै. सकाळ’ या वृत्तपत्राच्या माध्यमातून आपल्या उत्कृष्ट लिखाणाद्वारे शिक्षण व क्रीडा क्षेत्राची सेवा करणारे पत्रकार अरुण मलानी यांना यंदाचा ‘आदर्श क्रीडा पत्रकार पुरस्कार’ याप्रसंगी मान्यवरांच्या हस्ते प्रदान करण्यात आला. शाल, श्रीफळ, स्मृतीचिन्ह व पाच हजार रोख असे पुरस्काराचे स्वरूप होते.

*महाविद्यालय, रुग्णालयांचा गौरव*

राष्ट्रीय क्रीडा दिनानिमित्त झालेल्या रक्तदान शिबिरात सर्वोच्च सहभागाबद्दलचे प्रथम पारितोषिक कर्मवीर ॲड. बाबुराव गणपतराव ठाकरे अभियांत्रिकी महाविद्यालय यांना, द्वितीय पारितोषिक केटीएचएम महाविद्यालयास तर तृतीय पारितोषिक सटाणा महाविद्यालयास देण्यात आले. रुग्णवाहिका सेवा पुरस्कार अपोलो हॉस्पिटल, साईबाबा हॉस्पिटल, रेडक्रॉस हॉस्पिटल आणि भारत विकास ग्रुप १०१ यांना प्रदान करण्यात आला.

*गटनिहाय प्रथम क्रमांकाचे विजेते (एकूण सहभागी कंसात)*

१) ४२.१९५ किमी : डॉ. कार्तिक जयराज करकेरा-मुंबई (६४ )

२) २१ किमी : हरिश शेरॉन-हरयाणा (१०६)

३) १० किमी महिला खुला वर्ग : ज्योती मनोहर सरोज- नाशिक (५०)

४) १० किमी पुरुष खुला गट : अतुल शांताराम बर्डे- नाशिक (२३९)

५) १२ किमी – २५ वर्षाआतील मुले : कार्तिककुमार चाम्रुजी कारीहारपाल – नाशिक (२०९)

६) ०६ किमी – २५ वर्षाआतील मुली : पूजा प्रभाकर पारधी- नाशिक(१६८)

७) १० किमी – १९ वर्षाआतील मुले : ऋषिकेश विठोबा वावरे-नाशिक (२३०)

८) ५ किमी – १९ वर्षाआतील मुली : पूनम विष्णू शेवरे – नाशिक (१३१)

९) ५ किमी – १७ वर्षाआतील मुले : कुणाल लक्ष्मण ब्राह्मणे-नाशिक (६०२)

१०) ४ किमी – १७ वर्षाआतील मुली : रिद्धीमा नरेश मेहता-नाशिक (३६४)

११) ४ किमी – १४ वर्षाआतील मुले : चैतन्य कृष्णा श्रीखंडे- छत्रपती संभाजी नगर (४८२)

१२) ३ किमी – १४ वर्षाआतील मुली : श्वेता विजय सदगीर – नाशिक (३३०)

१३) ४ किमी – ६० वर्षावरील पुरुष : केशव माणिकराव मोटे- नाशिक (५०)

१४) ५ किमी – ३५ वर्षावरील महिला : डॉ. ऋषिका भारतकुमार पटेल-नाशिक (५५)

१५) २ किमी – ओपन फन रन : ३६४ (ही स्पर्धा आरोग्य व सामाजिक विषयांवर होती)

*फोटो कॅप्शन*

*१) ९ व्या राष्ट्रीय व १४ व्या राज्यस्तरीय ‘नाशिक मविप्र मॅरेथॉन २०२५’ स्पर्धेला हिरवा झेंडा दाखवून शुभारंभ करताना प्रमुख अतिथी भारतीय हॉकी संघातील खेळाडू तथा रियो ऑलिम्पिकपटू रेणुका यादव, आयोजन समितीचे अध्यक्ष व मविप्रचे सरचिटणीस ॲड. नितीन ठाकरे, सभापती बाळासाहेब क्षीरसागर व आदी मान्यवर.*

*२) हवेत फुगे सोडून ९ व्या राष्ट्रीय व १४ व्या राज्यस्तरीय ‘नाशिक मविप्र मॅरेथॉन २०२५’ स्पर्धेला शुभारंभ करताना प्रमुख अतिथी भारतीय हॉकी संघातील खेळाडू तथा रियो ऑलिम्पिकपटू रेणुका यादव, आयोजन समितीचे अध्यक्ष व मविप्रचे सरचिटणीस ॲड. नितीन ठाकरे, सभापती बाळासाहेब क्षीरसागर व आदी मान्यवर.*

*३) ‘नाशिक मविप्र मॅरेथॉन २०२५’ स्पर्धेतील फूल मॅरेथॉनमधील विजेत्यांचा गौरव करताना रियो ऑलिम्पिकपटू रेणुका यादव, ॲड. नितीन ठाकरे, सभापती बाळासाहेब क्षीरसागर व आदी मान्यवर.*