नाशिक महानगरपालिका क्षेत्रातील एकल महिलांचे सर्वेक्षण नाशिक महानगरपालिकेकडून एकल महिलांची माहिती संकलित करण्याची विशेष मोहीम

नाशिक महानगरपालिका क्षेत्रातील एकल महिलांचे सर्वेक्षण
नाशिक महानगरपालिकेकडून एकल महिलांची माहिती संकलित करण्याची विशेष मोहीम

नाशिक जन्मत       महाराष्ट्र राज्यातील एकल महिलांच्या सर्वांगीण विकासासाठी शासनामार्फत एकल महिला धोरणाचा मसुदा तयार करण्याची प्रक्रिया सुरू करण्यात आली आहे. या अनुषंगाने नाशिक महानगरपालिका क्षेत्रातील एकल महिलांचे सर्वेक्षण करून आवश्यक माहिती संकलित करण्याचे निर्देश देण्यात आले आहेत.
नाशिक महानगरपालिकेच्या महिला व बालकल्याण विभागामार्फत मनपा क्षेत्रातील एकल महिलांची माहिती संकलित करण्यात येणार आहे. या सर्वेक्षणाच्या माध्यमातून एकल महिलांची सामाजिक व आर्थिक परिस्थिती, त्यांच्या गरजा तसेच त्यांच्यासाठी आवश्यक असलेल्या विविध शासकीय योजनांची माहिती उपलब्ध होण्यास मदत होणार आहे.

सर्वेक्षणासाठी नोडल अधिकाऱ्याची नियुक्ती
सर्वेक्षणाचे काम प्रभावीपणे पूर्ण करण्यासाठी संबंधित विभागातील अधिकाऱ्यांची व आवश्यक कर्मचाऱ्यांची नियुक्ती करण्यात आली आहे. तसेच राष्ट्रीय नागरी उपजीविका अभियान (NULM) अंतर्गत संबंधित नोडल अधिकाऱ्याच्या माध्यमातून सर्वेक्षणाचे कामकाज करण्यात येणार आहे.

माहिती संकलनाची प्रक्रिया
एकल महिलांचे सर्वेक्षण करण्यासाठी निश्चित नमुन्यात माहिती संकलित करण्यात येणार आहे. संकलित माहिती Excel स्वरूपात जतन करून संबंधित विभागाकडे सादर करण्यात येणार आहे.
सर्वेक्षणाचे काम दि. 30 ऑगस्ट 2026 पर्यंत पूर्ण करण्याचे निर्देश देण्यात आले आहेत. सर्वेक्षणासाठी स्वतंत्र प्रशासकीय मान्यता किंवा निधीची आवश्यकता नसून उपलब्ध मनुष्यबळाच्या माध्यमातून हे काम पूर्ण करण्यात येणार आहे.

नागरिकांना आवाहन
नाशिक महानगरपालिका क्षेत्रातील एकल महिलांनी सर्वेक्षणासाठी आवश्यक माहिती संबंधित अधिकाऱ्यांना व कर्मचाऱ्यांना उपलब्ध करून देऊन सहकार्य करावे. एकल महिलांच्या समस्या, गरजा आणि त्यांच्या विकासासाठी आवश्यक धोरणात्मक उपाययोजना निश्चित करण्यासाठी हे सर्वेक्षण महत्त्वपूर्ण ठरणार आहे.